PSdeG-PSOE CARiÑO

Autonómicas 25-S: análise dos resultados PDF Imprimir Correo-e
Luns, 26 Setembro 2016 23:09

altComo facemos habitualmente trala celebración duns comicios electorais, neste caso as eleccións autonómicas deste 25 de setembro, dedicamos esta entrada a presentar os resultados e ofrecer unha breve reflexión sobre os mesmos.

En Cariño, e como podes ver no gráfico adxunto procedente da web do xornal El País, o Partido Popular foi a forza maioritaria colleitando 961 votos, seguido do PSdeG-PSOE con 397 votos. A coalición En Marea (Podemos, A Nova e EU-IU, entre outras forzas) quedou en terceiro lugar con 345 votos. BNG-Nós foi a cuarta forza (133 votos) e Ciudadanos quedou en quinto lugar con 35. O Partido contra o Maltrato Animal (PACMA) foi a sexta forza con 20 votos e ningún dos restantes partidos superou os 10 votos. Se comparamos os resultados cos das eleccións autonómicas de 2012, o PP descende oito votos, o PSdeG-PSOE descende 75, En Marea ascende 148 respecto a Alternativa Galega de Esquerda (AGE) e o BNG descende 52.

É xusto recoñecer a victoria do Partido Popular tanto a nivel local como autonómico. No caso de Cariño, confírmase unha vez máis que este partido obtén os seus peores resultados nas eleccións municipais, mellorando nos comicios autonómicos, estatais ou europeos. En particular, a dereita en Cariño acostuma a colleitar os seus mellores resultados nas autonómicas. Nesta ocasión a súa victoria é rotunda dado que o seu número de votos supera a suma dos colleitados polas tres forzas situadas no espectro ideolóxico da esquerda (PSOE, En Marea e BNG), que é de 875 votos. Dende a Agrupación Socialista de Cariño queremos transmitir un agradecemento moi especial ás 397 persoas que depositaron a súa confianza no noso partido.

Se analizamos as porcentaxes, o PSOE obtén en Cariño a séptima mellor porcentaxe de voto (20’46 %) entre os 20 concellos que integran as comarcas de Ferrolterra-Eume-Ortegal, superada nesta ocasión por A Capela (40’11 %), As Pontes (27’38 %), Monfero (25’84 %), Cerdido (24’35 %), Neda (23’04 %) e Pontedeume (21’14 %). A porcentaxe de voto socialista en Cariño supera á obtida polo noso partido a nivel autonómico (17’88 %), provincial (17’17 %) e comarcal (19’55 %).

En síntese, os resultados destas eleccións son moi negativos e obrigan ó noso partido en particular e á esquerda en xeral a unha profunda reflexión. É certo que o arraigo do PP en Galicia é notable, como tamén o é que contou nestas eleccións co apoio dos medios de comunicación públicos e privados, en ocasións ata extremos inaceptables. O PP fixo ademais unha boa campaña e obtivo bo resultado da táctica de ocultar as siglas do seu partido potenciando a figura de Feijóo. Pero tamén hai que dicir que as forzas do cambio chegamos a estes comicios con divisións internas, con candidatos de última hora e con escasa capacidade para comunicar un programa alternativo. Aténdonos ós resultados destas eleccións autonómicas, a mensaxe da rúa podería traducirse así: sabemos que o PP é malo, pero tedes que convencernos de que a alternativa é mellor. Estamos en condicións de facelo? Queda moito traballo por diante.

 
A semana decisiva: actos electorais en As Pontes e Cariño PDF Imprimir Correo-e
Martes, 20 Setembro 2016 19:19

O vindeiro domingo celébranse as eleccións autonómicas e tódolos indicios apuntan en dúas direccións: o cambio político é posible, e o PSdeG-PSOE está en condicións de lideralo. Atopámonos, pois, ante unha semana decisiva na que Galicia xógase seguir retrocedendo ou abrir unha nova experiencia de progreso e xustiza social.

O pasado venres os socialistas de Cariño efectuamos un reparto de información electoral no mercado municipal, acompañados de José Manuel Pérez Seco, candidato ó Parlamento de Galicia no posto número 5 da provincia da Coruña en representación de Ferroterra, Eume e Ortegal. Entre os actos que se celebran esta semana queremos chamar a atención sobre dous especialmente relevantes.

Este mércores 21 ás 19 horas terá lugar un mitin no Cine Alovi de As Pontes de García Rodríguez, no que intervirán o Alcalde de As Pontes e Presidente da Deputación Valentín González Formoso, o candidato á Presidencia da Xunta Xoaquín Fernández Leiceaga e o Secretario Xeral do PSOE Pedro Sánchez.

Ó día seguinte, xoves 22 de setembro, terá lugar o mitin en Cariño. Será ás 20:30 horas no Local Social do Concello e contará coas intervencións do Alcalde de Cariño José Miguel Alonso Pumar, do candidato comarcal José Manuel Pérez Seco e da Deputada no Congreso Pilar Cancela Rodríguez. Quedas convidad@.

alt

 
Novidades editoriais: de sombras, propostas e memorias PDF Imprimir Correo-e
Domingo, 18 Setembro 2016 23:54

16-09-18 novidades editoriaisSetembro adoita ser mes de novidades editoriais e aquí queremos facernos eco de tres libros recén publicados que merecen atención.

A poucos días das eleccións autonómicas toca facer balance do que supuxo a etapa de Núñez Feijóo na presidencia da Xunta de Galicia. A este respecto o novo libro de Manuel Monge, que leva por título O perverso goberno de Feijóo. Sete anos en negro (Edicións Laiovento), é máis que recomendable. Tal como se indica na súa sinopse: Cómpre un balance do desgoberno de Feijóo. Sete anos perdidos, sete anos en negro. Este é o «éxito económico» de Feijóo: no primeiro trimestre de 2009, co goberno bipartito (PSOE-BNG), Galiza tiña 162.700 persoas desempregadas, cunha taxa de paro do 12,22%, e acababa 2015 con 222.700 parados e unha taxa do 17,74%; nese mesmo período, a débeda pública de Galiza pasaba de 3.923 millóns de euros a 10.375 millóns, e Galiza perdía máis de 18.000 millóns de euros na súa capacidade de gasto, pasando de 11.793 millóns de euros en 2009 a 8.873 millóns en 2016. Galiza recada cada ano 3.000 millóns de euros máis do que despois inviste o Estado na nosa nación. Perdemos 8.464 millóns de euros dende a entrada en vigor do sistema de financiamento autonómico en 2009. E Feijóo calou.

Retroceso no Estado de Benestar. Recorte de 237 millóns de euros no orzamento de Sanidade (un 18%), hai un proceso de privatización da sanidade pública e suprimíronse máis de 3.000 postos de traballo. Recorte de 256 millóns de euros no orzamento de Educación desde 2009, coa perda de máis de 2.000 ensinantes. Hai 23.672 persoas dependentes, que seguen esperando por unha prestación, e 465.852 persoas (o 16,14% da poboación) viven na Galiza por debaixo do limiar da pobreza.

Desmantélase o sistema financeiro galego e as caixas fusionadas véndense, a prezo de saldo, a un banco venezolano. Perdemos o Banco Pastor e o noso aforro tamén emigra. Abandono de sectores estratéxicos da nosa economía: volven as tractoradas en defensa dun prezo digno para o leite; paralización da construción naval; temos menos barcos de pesca e perdemos caladoiros; a Xunta practica unha nefasta política forestal e o PP prorroga a concesión a Ence na ría de Pontevedra até 2073.

Continúa a corrupción nos concellos galegos e o financiamento ilegal do PP. O presidente da Deputación de Ourense, José Manuel Baltar, está procesado por ofrecer traballo a cambio de sexo. E Feijóo non sabía nada”. O autor do libro, Manuel Monge González (Valladolid, 1947), é un mestre e sociólogo afincado na Coruña, cidade en cuxo tecido asociativo está fondamente implicado. Foi ademais concelleiro do BNG en dita cidade e presidente da Comisión pola Recuperación da Memoria Histórica da Coruña. Ten publicados varios libros sobre política, historia da represión franquista e outros temas.

Outro libro ó que queremos referirnos aquí sitúase no ámbito das propostas de futuro que a esquerda debe incorporar, sen máis dilación, ó seu debate e acción política. Referímonos a Paraísos fiscales. 20 propuestas para acabar con la gran evasión, de Diego López Garrido (Los Libros de la Catarata). Tal como apunta a sinopse difundida pola editorial: “La liberalización de capitales y la despenalización de la evasión fiscal en la época de Thatcher y Reagan crearon un verdadero paraíso bajo los auspicios de la Unión Europea, pero ha sido en los últimos años cuando los escándalos de fraude fiscal y blanqueo de dinero se han sucedido hasta llegar a los Papeles de Panamá, la mayor fuente de información relevante que se haya entregado nunca a los medios de comunicación para su publicación. Sin embargo, aún no se ha proyectado en medidas de carácter político y legislativo eficaces, que tengan como resultado la desaparición de los paraísos fiscales. Este es uno de los fines principales de este libro: proponer un conjunto de medidas que hagan verdaderamente posible derribar los instrumentos en los que se asienta la inmensa evasión fiscal que forma parte de las sociedades desarrolladas -y no desarrolladas- de nuestro planeta”. O seu autor non precisa presentación, xa que foi deputado, voceiro do Grupo Parlamentario Socialista no Congreso entre 2006 e 2008 e secretario de Estado para a Unión Europea entre 2008 e 2011, entre outros cargos. Economista e catedrático de Dereito Constitucional na Universidad de Castilla-La Mancha, ten publicados diversos traballos no ámbito da súa especialidade.

O terceiro libro que queremos salientar aquí está coordinado por Rafael Simancas e leva por título Txiki Benegas, un hombre de bien (Fundación Pablo Iglesias). Trátase dunha compilación de textos e reflexións deste insigne socialista vasco, acompañada de testemuños de compañeiros seus como Felipe González, Patxi López, Alfredo Pérez Rubalcaba, José Luis Rodríguez Zapatero, Rodolfo Ares, Ramón Jáuregui, Bárbara Dührkop, Francisco Fernández Marugán ou Matilde Fernández.

Txiki Benegas (Caracas, 1948 – Madrid, 2015) foi unha das figuras máis relevantes do socialismo vasco dende os anos finais do franquismo. Deputado socialista dende 1977 e moi próximo a Alfonso Guerra durante boa parte da súa traxectoria, entre os anos 1984 e 1994 foi Secretario de Organización do PSOE. Publicou varios libros sobre temas políticos e sobre a paz en Euskadi, contribuíndo tamén ó estudo e recoñecemento desa outra gran figura histórica do socialismo vasco que foi Ramón Rubial.

 
Coñecer o noso: revista Terras do Ortegal e xornadas Memoria dun Tempo PDF Imprimir Correo-e
Sábado, 10 Setembro 2016 20:59

Daltous acontecementos relevantes no plano cultural tiveron lugar o pasado mes de agosto na comarca do Ortegal e deles queremos facernos eco na nosa web.

O primeiro foi a publicación do número 3 da revista Terras do Ortegal, que precisamente foi presentado en Cariño o pasado venres 2 de setembro. Editada pola asociación do mesmo nome, a publicación chega deste xeito con puntualidade á súa cita anual dende que aparecera por primeira vez no verán de 2014. Nacida con vocación de converterse na revista de estudos comarcais que nunca tivemos, este terceiro número supón un paso importante na súa consolidación. Cómpre recoñecer, en todo caso, que Ortigueira segue a ser o concello que merece un maior número de artigos, aínda que progresivamente van gañando presenza outros concellos da comarca. O número 2 da revista, publicado no verán do ano pasado, contén un dossier con seis artigos sobre temas do noso concello.

Nesta ocasión o dossier temático está dedicado á Idade Media no Ortegal, con tres artigos a cargo do cronista ortigueirés Carlos Breixo, do arqueólogo David Fernández Abella e do párroco Francisco Javier Martínez Prieto. O segundo destes artigos, que fai un breve repaso polo rexistro arqueolóxico medieval da comarca, inclúe algunhas referencias a xacementos do noso termo municipal como San Xiao do Trebo ou o Castelo da Pedra. Este número inclúe tamén unha escolma de textos do semanario La Voz de Ortigueira con motivo do 100 aniversario da súa fundación, un dos deles sobre o párroco cariñés Jesús Crecente Veiga. Tamén cabe mentar o artigo de Luis Real sobre as iniciativas de recuperación da memoria histórica que están a desenvolver en Mañón, no que relata o afundimento do pesqueiro Almirante José de Carranza a cargo dun submarino italiano en setembro de 1940 preto de Cabo Vilán, dramático episodio no que faleceu un mariñeiro de A Pedra, Vicente Garrote Anido. Outros artigos versan sobre os túmulos megalíticos da comarca, a toponimia de Cerdido ou a figura de David Fojo Salgueiro, anterior editor de La Voz de Ortigueira que recibe un sentido recoñecemento de Manuel López Foxo.

Dende aquí queremos felicitar ós editores de Terras do Ortegal polo seu labor e animalos a continuar. A revista está á venda en librerías dende hai semanas.

O segundo acontecemento ó que queremos referirnos é a celebración no Barqueiro das VI Xornadas Memoria dun Tempo, organizadas pola activa asociación Nordés, con sede nese mesmo concello de Mañón. As xornadas teñen lugar con carácter anual, normalmente a finais de agosto, e soen tratar temas relacionados coa memoria histórica, a represión franquista e a experiencia republicana. Neste caso contaron coa participación do historiador Julio Prada, que impartíu a conferencia Marcharon con todo. A represión económica en Galicia durante o primeiro franquismo, revelando unha faceta menos coñecida da represión tralo alzamento: as sancións económicas e o expolio ó que foron sometidas moitas familias en Galicia, en moitos casos polo mero feito de ter unhas ideas de progreso e xustiza social. A conferencia da profesora Carmen Blanco, ó día seguinte, levou por título Vivas en nós. Memoria de mulleres libres e vida liberada fronte á dictadura, que estivo seguida dun recital poético dela mesma e de Claudio Rodríguez Fer. O sábado 27, último día das xornadas, contou cun completo programa que comezou pola mañá na Ponte Vella do Barqueiro cunha homenaxe ós republicanos e libertarios, seguida dun xantar de irmandade. A última hora da tarde tivo lugar a proxección do documental A pegada dos avós, de Xosé Abad, e a continuación pecháronse as xornadas cun recital musical de Miro Casabella e Andrés Rodríguez. Como tamén é habitual, publicouse un folleto (máis de 30 páxinas) cos resumos das conferencias e outros textos relacionados, entre eles o do cariñés Andrés Modesto Alonso Rodríguez sobre o seu avó Cariño López.

Dende a Agrupación Socialista de Cariño queremos expresar a nosa satisfacción por estas e outras iniciativas que se están a desenvolver na comarca en relación coa promoción dos estudos locais e a recuperación-revalorización do noso patrimonio natural e cultural, liñas de traballo sempre necesarias e ás que tengamos achegar o noso gran de area.

 
<< Inicio < Anterior 1 2 3 4 5 6 7 8 9 10 Seguinte > Final >>

Páxina 1 de 184
Temos 2 convidados en liña

Acceso