PSdeG-PSOE CARiÑO

A web entra en obras PDF Imprimir Correo-e
Sábado, 07 Xaneiro 2017 20:33

altCo inicio deste novo ano abrimos unha etapa de cambios nesta web, que agardamos sexa breve e afecte o menos posible ó funcionamento normal da mesma. Aínda estamos estudando os detalles desta renovación, pero probablemente afectarán tanto a contidos como a aspectos estéticos e técnicos. O que si podemos prever é que durante algún tempo –que, insistimos, agardamos sexa o máis curto posible- a frecuencia de publicación reducirase bastante. Sen embargo, os contidos publicados ata hoxe seguirán dispoñibles e podes filtralos por temas mediante a opción Buscar do Menú principal.

Este sitio web da Agrupación Socialista de Cariño creouse na precampaña das eleccións municipais de 2003, nas que o noso partido recuperaría o goberno municipal abrindo unha nova etapa de oito anos á fronte do Concello. Nos anos seguintes a web tivo varios cambios de formato ata adoptar o seu deseño actual en setembro de 2009. O cambio principal introducido nesa altura con respecto a formatos anteriores foi unha páxina principal dinámica na que publicamos novos contidos periodicamente. A partir dese momento, a páxina convertiuse no principal medio de expresión do socialismo cariñés. Nestes algo máis de sete anos levamos publicadas nesta web 747 entradas coa distribución que podes ver na gráfica adxunta. Os anos 2010 e 2011 foron especialmente intensos con 210 e 164 entradas respectivamente. O descenso dos anos posteriores débese, en boa medida, á creación no noso perfil de Facebook (posteriormente reconvertido a páxina) na precampaña electoral de 2011, medio que a partir de entón empregamos para difundir noticias de carácter máis inmediato que antes –a falta deste recurso- aparecían na web. Nos últimos cinco anos (2012-2016) o ritmo de publicación anual oscilou entre as 55 e as 78 entradas.

Estes sete anos e catro meses supoñen a etapa máis longa da nosa páxina web. Co obxectivo de que siga sendo o noso principal medio de expresión e un instrumento útil para a cidadanía, cremos que chegou o momento de facer cambios. Seguiremos informando.

 
Tempos difíciles: un balance de 2016 PDF Imprimir Correo-e
Venres, 30 Decembro 2016 17:24

altRemata un ano difícil a tódolos niveis. A escala internacional foron doce meses de pésimas noticias, coa crise humanitaria d@s refuxiad@s da guerra de Siria, o resultado do referendum do Brexit no Reino Unido, a victoria de Donald Trump nos EEUU ou os atentados islamistas en Niza, Orlando ou Berlín, por citar algúns dos acontecementos que xearon o sangue.

Dentro das fronteiras do estado español tamén houbo escasos motivos para o optimismo. A crise económica e laboral axiña cumplirá unha década e os indicios de recuperación seguen sendo febles. A lacra da violencia machista, lonxe de deterse, segue arroxando cifras e episodios alarmantes. Non menos preocupante, neste contexto, é a crise da esquerda e a súa incapacidade –agardamos que temporal- para ofrecer as alternativas que a maioría social necesita. O ano remata con gobernos da dereita en España e en Galicia –aquí con maioría absoluta- e con xestoras socialistas en Madrid e en Santiago, no primeiro dos casos tras un Comité Federal para esquecer que rematou coa dimisión de Pedro Sánchez como Secretario Xeral. Nas outras esquerdas o panorama tampouco resulta demasiado alentador. Mención específica merece a situación de Podemos, que, despois de ter impedido un goberno de cambio tralas eleccións do 20D, afronta o seu próximo cónclave de Vistalegre cunha profunda división interna. Como xa temos feito noutras ocasións ó longo deste ano, nesta última entrada de 2016 apelamos á sensatez e ó esforzo colectivo da militancia socialista –e moi en particular dos máximos dirixentes do partido- para afrontar o futuro inmediato. A maioría social deste país necesita un PSOE forte.

No ámbito local seguimos acusando a crise dos nosos sectores produtivos tradicionais. Cariño en particular, e as comarcas de Ortegal e Ferrolterra en xeral, precisan novos activos socioeconómicos e factores que os incentiven, como a mellora das comunicacións. Nestes ámbitos está a traballar o noso Goberno Municipal. Este foi, ademais, un ano no que se produxeron avances en proxectos importantes como a Escola Infantil, o Centro de Día e Residencia de Maiores, o Local Social de Sismundi ou a mellora da estrada na curva da Ortigueira. No ámbito sociocultural a administración municipal fixo tamén un esforzo salientable, con iniciativas como a coordinación das festas de verán (que contaron coa colaboración inestimable dos colectivos veciñais), o ciclo Cinemas de Galicia ou a Mostra de Teatro. Un proxecto que pode ser relevante para Cariño e a comarca, o Xeoparque de Cabo Ortegal, recibíu tamén un impulso coas recentes xornadas promovidas polo Concello. Polo demais, non é o obxectivo desta entrada ofrecer un balance da actuación do Goberno Municipal, que agardamos levar a cabo nun futuro próximo.

Como en cada final de ano, nesta entrada queremos tamén lembrar ás persoas relevantes da esquerda que nos deixaron ó longo de 2016. A máis controvertida e poliédrica de todas elas é sen dúbida a de Fidel Castro, perda especialmente sentida entre persoas de militancia comunista pero cuxas contribucións a unha sociedade máis xusta –que sen dúbida as tivo- deben ser recoñecidas polo conxunto da esquerda e da sociedade, o cal non resulta incompatible, por suposto, coa crítica a aspectos moito menos positivos do seu legado. Pero neste ano 2016 perdemos tamén a persoas comprometidas –na comarca, en Galicia, en España e no ámbito internacional- co socialismo, o progresismo e as causas da esquerda, xa fose dende a militancia, dende a xestión política ou dende a reflexión intelectual. Pedindo desculpas polas omisións involuntarias, queremos lembrar aquí a Ramón Almagro, Francisco Bellón, Javier Carballo Oseira, Roberto Casteleiro, Manuel Lamas Soto, Blanca Quintanilla Rico, Daniel Romero López, María Teresa Alvajar, Fermín Bouza Álvarez, Bibiano Morón, Celestino Poza, José Rábade Arias, José Ángel Vázquez Urtiaga, Rubén Almeida, Antonio Asunción, Francisco García Salve, Enrique Hinojosa Vázquez, Carmen Lafuente Rubio, Marcos Ana, Juan Carlos Rodríguez, José Luis Serrano Moreno, Tomás Tueros, Jo Cox, Umberto Eco, Darío Fo, Víctor Mora, Alan Rickman e Ellen Meiksins Wood.

Coa presente publicamos un total de 55 entradas nesta web durante o ano 2016. Se as distribuísemos de maneira homoxénea –que non é o caso- ó longo dos 365 días deste ano bisiesto, darían unha media dunha entrada cada 6,63 días. Destas 55 entradas, 49 estiveron acompañadas de imaxes mentres que as 6 restantes tiveron unicamente texto. En canto á distribución temática, a maior parte das entradas (33) versaron sobre política municipal e asuntos locais. Os asuntos de política provincial e autonómica mereceron 8 entradas, mentres que outras 9 xiraron en torno á política estatal. En canto a entradas seriadas, Pensar dende a esquerda acolleu unha entrada e Coñecer o noso outras dúas. Por último, unha entrada versou sobre esta páxina web e a outra é a que agora estás a ler.

Rematamos este balance anual dende a Agrupación Socialista de Cariño agradecendo a túa visita a esta páxina e cos nosos mellores desexos para o 2017. Probablemente as cousas tampouco serán fáciles, pero seguiremos achegando o noso esforzo decidido para melloralas.

 
Nas orixes da Agrupación Socialista de Cariño PDF Imprimir Correo-e
Xoves, 22 Decembro 2016 22:44

altHai uns días, revisando antigos números da revista local Nordeste, atopámonos co texto a páxina completa sobre a apertura do local social do entón Comité Local do PSdeG-PSOE, predecesor da actual Agrupación Socialista de Cariño. O evento inaugural tivo lugar o 24 de abril de 1982 e foi recollido no número 9 da segunda época da mentada revista, publicado no mes de xuño.

A ese acto de apertura asistiron militantes e simpatizantes locais, así como militantes de Ferrol, Fene, Mugardos e outros concellos da comarca. En representación da Executiva Nacional Galega asistiron Rosa Gómez e Antonio Gato, secretario de Política Municipal e deputado autonómico. A revista inclúe unha breve entrevista a este último, cuxo tema principal é a independencia municipal de Cariño. Por último, a páxina inclúe unha breve nota do Comité Local na que se anuncia a intención de abrir proximamente no local unha oficina do sindicato UXT.

Anos despois, como probablemente saberás, a sede da Agrupación trasladaríase a un local situado na rúa Balbís, onde permanecemos na actualidade. Somos, polo tanto, a única forza política que vén facendo un esforzo sostido no tempo, durante máis de 30 anos, para manter unha sede física en Cariño. Un local que mantemos única e exclusivamente grazas ó esforzo da militancia e que pretendemos seguir dinamizando: un testemuño máis do noso compromiso con este Concello e con toda a súa cidadanía.

Queremos aproveitar esta entrada para desexarche unhas Felices Festas, agardando que podas desfrutar destas datas na compaña das persoas queridas.

 
Xeoparque de Cabo Ortegal: balance da xornada PDF Imprimir Correo-e
Luns, 19 Decembro 2016 00:00

altO sábado 10 de decembro tivo lugar no Auditorio Municipal a xornada sobre o xeoparque de Cabo Ortegal, organizada polo Concello de Cariño. Como xa estaba anunciado, o evento contou cun plantel del altísimo nivel que nos permitíu coñecer mellor as potencialidades do noso territorio e as posibilidades dun proxecto deste tipo. Na sesión da mañá os xeólogos Ricardo Arenas, Richard Albert, Sonia Sánchez e Juan Ramón Vidal Romaní explicaron as últimas investigacións sobre o Complexo Xeolóxico de Cabo Ortegal. Na sesión de tarde José Ángel Sánchez Fabián, Leire Barriuso e Artur Abreu Sá explicaron varios exemplos de procesos de declaración e modelos de funcionamento de xeoparques da UNESCO (a foto que acompaña a esta entrada, tomada da edición dixital de La Voz de Galicia, ilustra un momento da xornada).

Os dous exemplos que recibiron especial atención foron os de Las Loras, aínda pendente de aprobación, e Costa Vasca. O primeiro é un caso de xestación lenta, iniciado dende a sociedade civil en 2004 e que comprende 16 termos municipais. O xeoparque de Costa Vasca, en cambio, comprende unicamente tres concellos e foi promovido dende os entes municipais que o integran e que participan na asociación responsable da súa xestión. Aínda tendo en conta as diferencias de modelo, quedaron claras as posibilidades de desenvolvemento que ofrecen os xeoparques en ámbitos como o turismo de calidade, a hostalería, o educativo ou o fomento da investigación.

O xeoparque pode convertirse nun proxecto estratéxico para unha comarca que precisa novas oportunidades de desenvolvemento socioeconómico. O evento contou coa presenza de alcaldes e concelleiros de sete concellos da comarca, que nos días posteriores declararon a súa vontade de seguir adiante cun proceso que, sen dúbida, vai a requerir un esforzo de coordinación importante. Na xornada tamén quedou claro o imprescindible que resulta a implicación cidadá. Queda moito traballo por diante, pero o encontro celebrado en Cariño supuxo un bo pulo para o proxecto.

 
<< Inicio < Anterior 1 2 3 4 5 6 7 8 9 10 Seguinte > Final >>

Páxina 1 de 188
Temos 4 convidados en liña

Acceso