PSOE Cariño

O xoves 28 de novembro tivemos Pleno Ordinario no Concello de Cariño. Pasamos, a continuación, a explicar os temas tratados e a nosa posición sobre os mesmos.

Votamos favorablemente a acta do Pleno ordinario celebrado o 26 de setembro.

No punto segundo dase conta dos Decretos de Alcaldía dende a última sesión plenaria ordinaria: do 381/2024 de 20/09/2024 ata o 496/2024 de 25/11/2024.

No terceiro punto da Orde do Día tratamos diferentes mocións presentadas polos grupos municipais. O Grupo Municipal Socialista presentou tres mocións.

MOCIÓN SOBRE A CONVOCATORIA DE AXUDAS DO CONCELLO DE CARIÑO

Podes ver o texto completo desta moción aquí.

Propuxemos a adopción dos seguintes acordos:

1º.- Sobre as Subvencións e axudas para entidades sen fin de lucro do Concello de Cariño ano 2024: o incremento do orzamento das axudas ata 36.000€ e do importe máximo de axuda a cada asociación a 3.000€, cantidades que corresponderían ao importe das axudas de 2023 e 2024.

2º.- A convocatoria por parte do goberno municipal das Axudas para sufragar as actividades culturais, educativas e deportivas, que contan con consignación presupostaria de 8.000€ no orzamento municipal.

A moción saíu adiante cos votos a favor do PSdeG e BNG, e coa sorprendente abstención do PP. Logo de escoitar a explicación da súa postura, todo apuntaba a que votarían en contra. A Alcaldesa dixo que non era necesario convocar as axudas para os estudantes, xa que cubrían esta necesidade a través de emerxencia social. Pola nosa parte, manifestamos que as axudas de emerxencia social son axudas de último recurso, para momentos e familias moi vulnerables, e que se solicitan para necesidades concretas e puntuais. Non ten sentido obrigar ás familias a facer unha solicitude mensual, con todo o papeleo que supón, cando a convocatoria de axudas é única, baremable e abrangue todo o ano.

Sobre as axudas ás asociacións, o equipo de Goberno non entende necesario o incremento do orzamento xa que en anos anteriores ningunha asociación chegou a xustificar a cantidade completa. Dende o Grupo Municipal Socialista poñemos en dúbida esta afirmación, e solicitaremos a documentación das convocatorias anteriores para comprobalo. De todas formas, estamos a falar dunha convocatoria para dous anos, polo que entendemos que o lóxico é que se duplique o orzamento.

MOCIÓN SOBRE OS TERREOS DE PORTOS DE GALICIA SEN USO PORTUARIO

A Lei de Costas obriga á Xunta de Galicia a devolver ao Estado os espazos portuarios que xa non están en uso, podendo ser cedidos con posterioridade aos Concellos unha vez desafectados, cesión que terá carácter gratuíto segundo a Lei.

No caso de Cariño, podemos citar como exemplo destes espazos a Praza Roxa, o “campín”, antigas fábricas, os terreos onde están situados a Casa do Concello ou o Mercado, etc. O Concello, ademais de encargarse do mantemento, ten que pagar a Portos de Galicia polo seu uso.

En maio de 2023, a Demarcación de Costas iniciou o procemento de reversión dos terreos e en novembro, no Pleno do Concello, aceptamos recibir os terreos e darlles un uso público de interese xeral. Para aprobar o expediente, é necesario que Portos de Galicia lle dea o visto e prace ao procedemento.

A nosa proposta ao Pleno (podes ver o texto completo da moción aquí) foi a seguinte:

– Instar a Portos de Galicia e á Xunta de Galicia a que cumpran coa maior celeridade posible os acordos tomados coa Federación Galega de Municipios e Provincias en setembro de 2021, e faciliten a tramitación da declaración de innecesariedade solicitada polo Concello de Cariño.

– Solicitar a Portos de Galicia a modificación da Lei 6/2017 de Portos de Galicia e exima do pago de taxas aos concellos galegos pola utilización de espazos portuarios -especialmente en aqueles en desuso- cando as concesións ou actividades temporais dos Concellos teñan un evidente interese público.

O Concello aforraría moitos cartos que lle pagamos a Portos de Galicia. A moción aprobouse por unanimidade.

MOCIÓN SOBRE A DRAGAXE NO PORTO E O DEPÓSITO NA BASTEIRA

A posición do Grupo Municipal Socialista está resumida aquí.

A nosa proposta ao Pleno foi a seguinte:

– A convocatoria dunha reunión da Xunta de Voceiros do Concello, coa asistencia de persoal técnico de Portos de Galicia e da Demarcación de Costas.

Solicitar a Portos de Galicia, administración promotora das obras:

– Que a cidadanía teña acceso a toda a documentación relativa ao proxecto.

– A suspensión definitiva dos traballos de depósito de area na praia da Basteira.

– A valoración dos danos causados polos traballos na praia e no sistema dunar e a análise do material depositado na mesma.

– A modificación do proxecto, depositando os sedimentos previstos na dragaxe no mar, e non nas praias da Concha ou A Basteira.

– A realización dun estudo de impacto ambiental para os traballos de dragaxe, tendo en conta que a maior parte teñen lugar en espazos da Rede Natura.

O PSdeG e o BNG votamos a favor (5 votos) e o PP votou en contra (3 votos).

O BNG presentou dúas mocións: unha sobre a dragaxe, aprobada tamén cos votos a favor de PSdeG e BNG e cos votos en contra do PP, e outra sobre a lingua galega, aprobada por unanimidade.

(completaremos este resumo nos vindeiros días)

No Pleno Ordinario do Concello de Cariño celebrado o xoves 28 de novembro o noso partido presentou tres mocións. De dúas delas (dragaxe no porto e depósito na praia da Basteira, e convocatoria de axudas do Concello) xa demos conta aquí en días pasados. Aquí reproducimos o texto da terceira, relativa ós terreos de Portos de Galicia sen uso portuario.

EXPOSICIÓN DE MOTIVOS

A Lei 22/1988, de 28 de xullo, de Costas, é o marco xurídico que define a protección e a utilización do dominio público marítimo-terrestre e especialmente  a ribeira do mar. O artigo 49 define a adscrición de bens de dominio público marítimo-terrestre ás Comunidades Autónomas para a construción de portos. No artigo 50 determínase o que acontece cando o espazo adscrito xa non é utilizado para un fin portuario, como acontece no caso de Cariño. Os bens de dominio público marítimo-terrestre adscritos a unha Comunidade Autónoma conforme ao previsto no anterior artigo, que non sexan utilizados para o cumprimento do fin aos que se adscribiran, ou que sexan necesarios para a actividade económica ou o interese xeral, segundo os artigos 131 e 149 da Constitución, reverterán ao Estado, previa audiencia da Comunidade Autónoma, polo procedemento que se determine regulamentariamente, e daráselles o destino que en cada caso resulte procedente.

A Lei 22/1988 no seu artigo 18 establece que poderán ser desafectos os terreos deslindados como dominio público que por calquera causa perderan as súas características naturais de praia, acantilado ou zona marítimo terrestre previo informe preceptivo do Concello e da Comunidade Autónoma. No artigo 19 establécese que os terreos desafectos incorporaranse ao Patrimonio do Estado e, cando non se xulgue previsible a súa afectación, poderán ser cedidos gratuitamente ao Concello, condicionándose a cesión a que teñan  unha finalidade de servizo público dentro das competencias municipais.

Isto é, a Lei de Costas obriga á Xunta de Galicia a devolver ao Estado os espazos portuarios que xa non están en uso, podendo ser cedidos con posterioridade aos Concellos unha vez desafectados, cesión que terá carácter gratuíto segundo a lei.

Tras diversas reunións entre Concello de Cariño, Portos de Galicia e a Demarcación de Costas, con data 13 de decembro de 2018 o Concello de Cariño solicita a declaración de innecesariedade para o DPMT de determinados terreos adscritos ao ente autonómico Portos de Galicia para servizo do Porto de Cariño. Así mesmo, a súa posterior reversión ao Estado, desafectación e cesión á administración local.

Fundamenta a solicitude de innecesariedade dos devanditos terreos entre outros aspectos en:

1. Os terreos afectados atópanse totalmente integrados na trama urbana e inclúen numerosos edificios e espazos de uso público cotián -non portuario- polos que a administración local debe desembolsar periodicamente a Portos de Galicia unha elevadísima suma económica polo seu uso veciñal.
2. Todas e cada unha das áreas citadas (prazas, zonas verdes, antigas fábricas cedidas ao Concello…) deben ser conservadas pola administración local, entidade que por tanto non só paga taxas por uso senón que ademais sufraga tales gastos de mantemento.
3. Existe incumprimento de artigo 105.2.b do Real Decreto 876/2014, do 10 de outubro, polo que se aproba o Regulamento Xeral de Costas, ao existir unha ocupación para usos non portuarios en máis do 10 % da superficie de terra do Porto de Cariño.

En setembro do ano 2021 a Federación Galega de Municipios e Provincias (FEGAMP) chegou a un acordo con Portos de Galicia e a Xunta de Galicia para resolver esta situación, co obxectivo final de que os Concellos reciban de forma gratuíta os espazos portuarios en desuso tal e como permite a Lei de Costas.

Portos de Galicia marcou o 15 de outubro de 2021 como data límite para que os Concellos presentasen as súas solicitudes e o Concello de Cariño fixo os trámites en tempo e forma.

Por Resolución da Dirección Xeral da Costa e o Mar de data 27 de abril de 2023 autorízase á Demarcación de Costas de Galicia para que leve a cabo a incoación do expediente de declaración de innecesariedade para a protección do dominio público de terreos adscritos a Portos de Galicia, afectados polos deslindes aprobados por OO:MM: do 9 de novembro de 1971 e 3 de xuño de 1994, no termo municipal de Cariño (A Coruña).

O 30 de novembro de 2023 o Pleno Municipal aproba por unanimidade:

PRIMEIRO: Solicitar a declaración de innecesariedade dos terreos especificados no informe técnico de data 22/05/2023, para a posterior reversión, desafectación e cesión a favor do Concello de Cariño a efectos de aplicación do previsto nos artigos 4.5 e 18 da Lei 22/1988 de Costas, Disposición Adicional Terceira da Lei 2/2013 de modificación da Lei 22/1988, así como os artigo 27.1ª e 38 do Regulamento Xeral de Costas e Lei 33/2003, ao respecto da declaración de innecesariedade.

SEGUNDO: Acordar que de producirse a desafectación e cesión dos terreos ao Concello de Cariño, estes se adicarán ao uso público e gratuíto.

TERCEIRO: Aceptar e tomar coñecemento da situación rexistral das parcelas/inmobles afectados obxecto de desafectación, aos efectos establecidos no artigo 136.2 da Lei 33/2003.

Por todo exposto, o Grupo Municipal Socialista no Concello de Cariño, propón ao Pleno da Corporación a adopción dos seguintes

ACORDOS:

Unha vez iniciado o expediente por parte da Demarcación de Costas e aprobado por parte do Pleno Municipal:

– Instar a Portos de Galicia e á Xunta de Galicia a que cumpran coa maior celeridade posible os acordos tomados coa Federación Galega de Municipios e Provincias en setembro de 2021, e faciliten a tramitación da declaración de innecesariedade solicitada polo Concello de Cariño.

– Solicitar a Portos de Galicia a modificación da Lei 6/2017 de Portos de Galicia e exima do pago de taxas aos concellos galegos pola utilización de espazos portuarios -especialmente en aqueles en desuso- cando as concesións ou actividades temporais dos Concellos teñan un evidente interese público.

En Cariño, a 24 de novembro de 2024

A pasada fin de semana o noso partido celebrou en Sevilla o seu 41º Congreso Federal baixo o lema España adelanta por la izquierda. Aínda que o inicio do ciclo congresual estaba previsto para o 2025, a dirección do partido decidíu adiantalo un ano para encarar a segunda parte da lexislatura coas estruturas orgánicas renovadas e novas propostas programáticas.

Nun potente discurso de clausura, Pedro Sánchez insuflou ánimos á militancia, confirmou a súa intención de concurrir ás eleccións xerais en 2027 e realizou algúns anuncios importantes, como a creación dunha empresa pública de vivenda dependente da administración central.

A nova Executiva é claramente continuísta nos postos máis importantes, con Sánchez na Secretaría Xeral, María Jesús Montero na Vicesecretaría Xeral, Santos Cerdán na Secretaría de Organización e Cristina Narbona na Presidencia, pero introduce tamén caras novas. Galicia está representada por César Mogo (Exterior), Abel Caballero (vocal) e Inés Rey (en canto Vicepresidenta Primeira da FEMP), ós que temos que engadir a viguesa Emma López, actualmente afincada en Madrid, na importante Secretaría de Política Económica e Transformación Dixital.

O congreso servíu tamén para debatir e actualizar as propostas programáticas. Cos seus 145 anos de historia, o PSOE mantén os ideais de igualdade e xustiza social que inspiraron a súa fundación. Ó mesmo tempo, atopámonos actualmente nun mundo cambiante no que, sobre a base de ditos principios, é necesario afrontar retos cruciais: a desigualdade, as transformacións no mercado de traballo, o acceso á vivenda, as mudanzas demográficas e os fenómenos migratorios, o cambio climático, o auxe da ultradereita e do populismo reaccionario, o cuestionamento do coñecemento racional e científico, os dereitos reprodutivos, a dixitalización e as novas tecnoloxías… De todo elo falouse neste cónclave.

Como é costume no noso partido, o congreso de Sevilla supón ademais o inicio dun ciclo congresual que incluirá tamén, nos vindeiros meses, congresos autonómicos, provinciais e locais. A Agrupación Socialista de Cariño está participando activamente neste proceso, sobre o que seguiremos informando nesta web.

O pasado 8 de novembro de 2023 o Concello de Cariño emitía un comunicado informando do peche do Polideportivo Municipal debido a desperfectos causados por un temporal que tivo lugar naqueles días. Un ano despois, aínda non temos novas sobre súa reparación e apertura.

O Polideportivo é o único edificio municipal que permite a práctica deportiva a cuberto. Ademais, debido á proximidade ó Colexio, é utilizado polo seu alumnado para as actividades de Educación Física. En maio de 2023, froito dunha colaboración entre o Concello e a asociación Os Corzos de Ortegal e logo dunha campaña de micromecenado, instalouse un rocódromo que permite a iniciación á escalada para toda a veciñanza que o desexe.

Estamos a falar dun edificio de máis de 30 anos e que precisa un importante traballo de renovación. Por este motivo, o goberno socialista encargou na pasada lexislatura a redacción dun plan de reforma integral dividido en tres fases:

• Acondicionamento da cuberta: 138.909,23€.
• Adecuación da pista: 101.161,95€.
• Adecuación de acceso e vestiarios: 74.680,35€

Unha vez redactados os proxectos, o equipo de goberno socialista buscou o financiamento necesario para iniciar os traballos. Despois de varias conversas co Presidente da Deputación da Coruña, obtivemos o compromiso de financiamento, nun 80%, da primeira fase (acondicionamento da cuberta do Polideportivo) así como a reforma da cuberta da Casa de Cultura, unha obra tamén moi necesaria.

O importe total das dúas obras ten un custo de 239.448,13€, dos que a Deputación da Coruña achega 191.558,50€ e o Concello de Cariño a cantidade de 47.889,63€. Para poder asinar o convenio de colaboración entre as dúas administracións, é necesario obter os permisos sectoriais de diferentes entidades: Augas de Galicia, Servizo de Xestión Cultural e Servizo de Urbanismo da Xunta de Galicia e Demarcación de Costas.

En xuño de 2023, data de toma de posesión da nova Corporación, só faltaba por chegar o permiso do Servizo de Urbanismo da Xunta de Galicia, que se recibe en febreiro de 2024. Dende esta data, non existe impedimento para asinar o convenio e licitar as obras.

O Grupo Municipal Socialista pregunta en cada Pleno sobre a situación do Polideportivo e a axuda comprometida pola Deputación da Coruña. O Goberno Municipal dí que “está á espera dunha reunión”, pero despois de ano e medio de goberno e un ano coa instalación pechada, non vemos avances. Semella que acometer as reformas do Polideportivo Municipal non é unha prioridade para o actual equipo de goberno do Partido Popular.

O Grupo Municipal Socialista vén de presentar o pasado luns unha moción sobre a convocatoria de axudas do Concello de Cariño para o seu debate no próximo Pleno da Corporación.

Nos últimos anos, o Concello de Cariño convocaba, entre outras, dúas liñas de axuda:

– Axudas para sufragar as actividades culturais, educativas e deportivas, cun orzamento de 8.000€ anuais, dirixidas ao alumnado dende educación infantil ata o bacharelato. O obxectivo era que ningún rapaz ou rapaza se vise na obriga de deixa de asistir a unha actividade ou a clases particulares por motivos económicos.

– Subvencións para entidades sen fin de lucro do Concello de Cariño, cun orzamento anual de 18.000€. As asociacións desempeñan un papel fundamental e prioritario no desenvolvemento dun Concello (a nivel democrático, cultural, deportivo, educativo,…) por iso é importante colaborar con elas e axudar ao seu sostemento económico. Podemos citar como exemplos actuais de colaboración entre asociacións a iniciativa Cariño Comparte ou a organización do evento Centenario do naufraxio de A Cova, que terá lugar esta fin de semana.

No ano 2023, o novo equipo de goberno do Partido Popular non convocou ningunha das dúas axudas. O Grupo Municipal Socialista solicitou en varias ocasións no Pleno municipal a convocatoria das mesmas, xa que existe consignación presupostaria no orzamento municipal.

O pasado venres 15 de novembro, publícase no BOP a convocatoria de Subvencións e axudas para entidades sen fin de lucro do Concello de Cariño ano 2024. As axudas cobren os gastos das asociacións entre xaneiro de 2023 e outubro de 2024, pero o orzamento é o correspondente a só un ano: 18.000€.

A data de hoxe, aínda non se convocou a liña de axudas para as actividades.

Por todo exposto, o Grupo Municipal Socialista no Concello de Cariño, propón ao Pleno da Corporación a adopción dos seguintes acordos:

1º.- Sobre as Subvencións e axudas para entidades sen fin de lucro do Concello de Cariño ano 2024: o incremento do orzamento das axudas ata 36.000€ e do importe máximo de axuda a cada asociación a 3.000€, cantidades que corresponderían ao importe das axudas de 2023 e 2024.

2º.- A convocatoria por parte do goberno municipal das Axudas para sufragar as actividades culturais, educativas e deportivas, que contan con consignación presupostaria de 8.000€ no orzamento municipal.

O pasado 7 de outubro comezaban as obras de dragaxe no porto que promove a Xunta de Galicia. Estas obras consisten na extracción de 28.071 metros cúbicos de area, dos cales máis de 19.500 son na zona portuaria e 8.517 pertencen á rampla de varada. Os sedimentos da zona portuaria deposítanse no mar, a unhas 7 millas do porto, pero os procedentes da rampla de varada utilízanse para a “rexeneración de area” na praia da Basteira.

Os traballos de traslado, colocación e estendido do sedimento veñen creando unha forte alarma social entre a veciñanza. Ademais de botar area na praia cun forte cheiro e sen cribar (con moitas pedras e refugallos), están afectando ao sistema dunar. Non podemos obviar que a praia da Basteira, como gran parte do territorio do noso concello, forma parte da Rede Natura 2000 como Zona de Especial Protección de Aves (ZEPA) e como Lugar de Importancia Comunitaria (LIC), algo que parece esquecer Portos de Galicia á vista do que está a ocorrer.

Na prensa, Portos de Galicia manifesta que conta con todas as autorizacións necesarias para a realización dos traballos e que os resultados dos últimos estudos avalan a calidade da area extraída.

Dende a Agrupación Socialista de Cariño solicitamos ao Concello que nos envíe a documentación da que dispón (non entendemos como din en redes sociais que ninguén o fixo). Tamén descargamos o proxecto dende a plataforma de contratación de Portos de Galicia.

Lendo os informes das distintas administracións, vemos que son favorables aos traballos, pero poñen condicións á execución dos mesmos. Entre outros, o da Demarcación de Costas:

“Previo a la recolocación en playa deberán aportar documentación en la que se especifique como se va a efectuar el traslado, colocación y extendido del sedimento en las playas de la Concha y Basteira. En el extendido deberá extremarse el cuidado para no dejar crestas, lomos, baches… que puedan favorecer la acumulación de algazos o otros elementos de naturaleza orgánica que, en su descomposición, puedan repercutir negativamente en la oxigenación o equilibrio REDOX del substrato”.

O pasado martes, coñecemos a noticia de que a Demarcación de Costas paralizou cautelarmente os traballos. Entendemos que, de forma inicial, informou favorablemente da dragaxe e a utilización da area para a rexeneración da praia, pero á vista da execución da mesma, non se está a cumprir co proxectado.

Por todo o anterior, a Agrupación Socialista de Cariño solicita:

– A convocatoria dunha reunión da Xunta de Portavoces do Concello, coa asistencia de persoal técnico de Portos de Galicia e da Demarcación de Costas.

– Que a cidadanía teña acceso a toda a documentación relativa ao proxecto.

– A suspensión definitiva dos traballos de depósito de area na praia da Basteira.

– A valoración dos danos causados polos traballos na praia e no sistema dunar e a análise do material depositado na mesma, procedendo á retirada das pedras e refugallos.

– A realización dun estudo de impacto ambiental para os traballos de dragaxe, tendo en conta que a maior parte teñen lugar en espazos da Rede Natura.

Nota: as imaxes aéreas que acompañan a esta entrada son de Ortegal Race. As fotografías de refugallos son fotografías da cidadanía tomadas das redes sociais.